آنامی گورمگه گلدیم ساچینی هورمهگه گلدیم
آنامی گورمگه گلدیم
ساچینی هورمهگه گلدیم
باش قویمالی ایاغینا
جانیمی وئرمهگه گلدیم
باغرینا باسدی قورودو
آینا کیمی دوپ دورودو
من هله احساس امیرم
اورمو گولو قوپ قورودو
بئلینه چالمیشدی منی
قوینونا آلمیشدی منی
من بیر اوشاق سن بیر آنا
قلبینه سالمیشدی منی
سَسلَهدیم عشقی اوجادان
دوش قلبیمه گل پاجادان
من هلهده سون بئشیگم
آلمیشام ایلهام قوجادان
قارداش اولوب آتام گئتدی
دومانلیقدا چاشیب ایتدی
آغزی دوعالی بیر آنا
سنی گوروب یارام بیتدی
حیاتین اسراری سنده
باغی سنده باری سنده
قلبیم سنه شاققالانیب
یاری منده یاری سنده
گوزلرینی آچیب یومدو
عشقین داماریما جومدو
ابدیت یولون ایزله
بو دونیا بیر توهمدو
بیر نئی کیمی چالمالییام
قول بوینونا سالمالییام
اولوم ایتیملی دونیادا
سنین قادان آلمالییام
اوخون قویوبدو کامانا
ساچین آغارتدی زامانا
بیرده گلمز بو دورانا
سنین کیمی گوزل آنا
حوسینچیسن هیئتیسن
سن آللاهین رحمتیسن
اللرینده یاشیل قنوت
وارلیغیمین نعمتیسن
گوروم آزی، یوز یاشا سن
عیزتیله باشباشا سن
سعادت اولدوزو باتیب
چیخاندا دور، گَل قوشا سن
شئه مونجوقو سو یارپیزی
آلمالی چیلله قارپیزی
چال سازینی رقص ائلهیم
مبارک اولسون نووروزو
سینهن ائلین خزینهسی
کربلاسی مدینهسی
اورک یانار باش سئودالی
دونمز یاشار دونرگهسی
داماریمدا سود گولو سن
بوش سوزومه گولمهلیسن
چیرپیر اورک سنینایچون
احساسیمی بیلمهلیسن
آنا قَدرین آنا بیلهر
اوشاقینان آغلار گولر
قازانجیمین برکتی
کایناتا اومید چیلهر
