پایگاه خبری موج نو نیوز به هم پیوستن یک آغاز در کنارهم ماندن پیشرفت با هم کار کردن موفقیت
رضا قاسم پور :پنج‌شنبه آذر آیی‌نین سگیزی ۱۴۰۳ گونش‌ایلی گوهردشت‌ین تمبر موزه‌سینده، اوستاد هوشنگ جعفری(زنگانین تانینمیش میللی شاعیری) و هابئله محتشم عائله‌سینه گوره بیر طنطنه‌لی ساز و سوز مراسیمی رضاقاسم‌پورون (یاشار زنگانلی)نین اجراسی‌لا کئچیریلدی.
🔷بو اوچ ساعت‌لیک مراسیمده استانبول، تهران کرج و زنگاندان نئچه شاعیر،آشیق،اوخوجو و یازار حاضر اولوب و اوز شعرلرین و هابئله اورک دویونتولرین اشتراکا قویدولار.
🔷زنگانین جاوان و ایستکلی آشیقی “سهیل اسلامی درامی” و هابئله اوستاد “عطا شاهمرادی” تانینمیش خواننده‌‌میز دونه_دونه اوز سس و سازلارینان مراسیمین شوکتینه و لطافتینه آرتیرمیشدیلار.
🔷اوستاد “صمدی مرادی” کرجین قوجامان طنز و ساتریک شاعیری اوز شعرلری‌نن مجلیسی اووجا یئتیرمیشدی. مراسیمین سونوندا
صمدین یئنی کیتابلاریندان دوواغ قاپما مراسیمی(رونمایی) اولوندو.
🔷دوکتور صبا جعفری(اوستاد جعفری‌نین ایستکلی و دوشونجه‌لی قیزی)استانبولدا یاشامینی و اوردا دانشگاهدا تدریس و هنر و ادبیات ساحه‌سینده حیات یولداشی (اورهون کاباکلی)ایله برابر چالیشدیقی و اونون عائله‌سی‌ایله اوزه‌ل گوردوگو فرهنگی ایشلری آچیقلادیب و آلقیشلاندی.
🔷بو مراسیمده اوستاد حاج رحیم رشتچی قوجامان ۹۵ یاشلی معلیم اوز معلیم‌چیلیک خاطیراتین رحمتلیک غزل اوستادی “حسین منزوی”دن اشتراکا قویوب و آلقیشلاندی. اوستاد رشتچی دئمک زنگانین شفاهی تاریخی‌نین نماینده‌سی و آخیره قالمیش‌ایدی.
🔷مراسیمین بیر باشیندا دوکتور رامین سلطانی تاریخ‌چی،یازار و تدقیقاتچی دوستوموز، رالینسون سفرنامه‌سی‌نین ترجمه پروسه‌سی‌نی آچیقلادیب و بو سفرنامه‌نین تاریخی سئیرین اشتراکا قویدو.
🔷عزیز دوسلاریمیز:
داود مرادخانی، مرسل توکلی، خانیم دوکتور غفارنژاد، خانیم دوکتور آزیتا رشتچی،علی چمنی، پونه قاسم‌پور،واعظی و…
اوز سوز و صحبت‌لرین اوستاد هوشنگ جعفری و آیریجا ادبیات و موسیقی ساحه‌لرینده بیلدیردی‌لر.
🔷مهندس مهدی حسنی(هونرمند و کرجین عکاسی شوراسی‌نین باشچی‌لاریندان)مراسیمی‌‌ین فیلم و شکیل‌لرین چئکیب و هابئله سیدحسین موسوی(تمبر موزه‌سی‌نین باش مودورو)
بو گوزل مکانی و اوندا اولان ۲/۵۰۰/۰۰۰ قطعه تمبر و آیری کلکسیونلاری تانیتدیردی.
🔷جلسه‌ده شعر اوخویان شاعیرلرین آدی:
🔻هوشنگ جعفری
🔻صمد مرادی
🔻رضا قاسم‌پور(یاشار زنگانلی)
🔻شاهمرادی(آمانسیز)
🔻سلیم‌اوغلو
🔻یزدان‌پرست(فراز)
🔻محمود مصطفوی
🔻عزیز غفارنژاد(عزیز)
🔻جابر خیری
🔻صبا جعفری
🔻سولماز جعفری
🔻رامین سلطانی
🔻علیایی(یاشیل)
🔻یوسف عبدی
و…
🔷 یارین بویون قوجاقلادیم
یارین بویون قوجاخلادیم یارآغلادی من آغلادیم
یغیشدی قونشولار بوتون جارآغلادی من آغلادیم
باشیندا قارلی داغلارا دانیشدیم آیرلیق سوزون
بیر آه‌چکیب باشینداکی قارآغلادی من آغلادیم
طاریمدا نارآغاجلاری منی‌گوروب دانیشدیلار
بویومو زیتون‌اوخشاخدی نارآغلادی من آغلادیم
ایله کی اسدی بیر خزان تالاندی گوللریم منیم
خبر چاتینجا بولبوله خار آغلادی من آغلادیم
اورک سوزون دئدیم تارا سیملر اولدی پارا پارا
یاواش‌یاواش سیزیلدادی تار آغلادی من آغلادیم
دئدیم کی حق منیم‌کی‌دی باشیمی چئکدیلر دارا
طنف سیخاندا بوینومو دار آغلادی من آغلادیم
جعفری یم بویوم بالا غم اورکده قالا قالا
یار جانمی آلا آلا یار آغلادی من آغلادیم
هوشنگ‌جعفری
🔷سارماشیق
بیر جان اولا، جانان اولا، بیر ده سن
بوسه آلام، گاه باریشان، گاه کوســن
آیدان آری، گوندن ایشیــق، گؤزلــرین
سارماشیقام قول بوینوما هؤرمه سن
منده بوغول، منده دورال، آینا تک
مجازدایام، حقیقتی گؤرمه سـن
قووشـارام، شق القمر اولســـادا
عشیقیمیزی سن آرادان بؤلمه سن
شهیــدینـم ، فاجعه لر اسیـری
سئودالیام، جان وئره رم، وئر دئسن
اللرینـده یاشیــل قنوت، باهــار ســن
اینان گؤزل، سئودا منم، سئوگی سن
ارزشی وار، جنت سنین، یار سنین
کایناتین مالیاتین، ایسته سن
هیجران آجی، آرزی اوزون، قیسسا اَل
یوخدو وصال، حق قاپیسین دؤیمه سن